Mar 6 | MCQ | STEP | Hu kwaa kajaho arema 'urine Huni kwaa anejijino tisaiporuhwa pu'úmo va'ara.

Mark 6

Jesu Nasareti Vaji Pataarohajina

(Matiu 13:53-58; Ruku 4:16-30)

1 Hu kwaa kajaho arema 'urine Huni kwaa anejijino tisaiporuhwa pu'úmo va'ara. 2 Sapati veijino Hu va'e Sinakoku ea najahana. Ea mapoka sea kajaho ani re'eme Hu 'waramaji pu henareja oja hwa'usahara. Pu ijá 'wava Hura 'waramu kajaho ichi apenane? Hu ichi kamane? Irara Hu nahane? 'Ene ijí unekajihuni harura Hu ichá'ina veno? 3 'Ú Hu kapinita? 'Ú Hu Meri oni Harihe? 'Ú Jemisi 'ee Josisi 'ee Jutasi 'ee Saimani Huni 'u'uhije? 'Ú Huni ma'ipija iki hijo? 'wavara. 'Enajihuna'e pu Jesu pataarohara. 4 Jesu pu ijá 'iama Ea ka'ene poropeti ijihuni araneji hijujija 'ee huni kachi'ina huni amuhija 'ee huni kwai ea ka'ene hijujija huni hura pavejura 'iamana. 5 Kwaa kajaho Huni harura panajahana kaivo ea kwinu kwino atama navajaho Hu ni'aha kwino ija puni haha 'ahi irechavume maraniara. 6 Pu Jesu kamareja panimaa rojajaho Hu niho'o puruva renana. Túna'i Jesu va'e arara kajino ea mapoka najahapene onana.

Jesura Tisaiporua Irechamiume Usema Va'ajina

(Matiu 10:5-15; Ruku 9:1-6)

7 Jesu Huni tisaiporu iropu ropu no'o 'waravume roumakivi'i irechamiume kwaaka mapokakino ea najahapene o'irono no'o no'o va'iro vejumakivi'i Hu Huni harura tisaiporu mihe 'ee 'avena sisea siomahuni harura 'u'o mihana. 8 Hu najaharena ijá 'iama Ja uneunecha mapoka pa'eka'avara kaivo pijuharu 'eka'avara. 'Iruma pa'eke suvaikia pa'eke monia tuja vaji pa'eka'avara. 9 'Enakaivo siripasieru same 'ee ateha no'o pa'eka'avara 'iamana. 10 Hu pu ijá 'iama Ja ara pini useme sea pini aji'avajaho sea kaji hinuva'o ara kaji are'irono are'avara. 11 Ja ara pini va'e pu ja pataarorahe joni vu'a pahe'i 'ahie veja ki'avajaho nijinakúne joni mumora hari túa taireve ariha kimareje ea mapoka hene kimareje ijá 'wahune Ea kajija puni vu'a paheju kamare'e avaju 'wahuna 'iamana. 12 'Ejume pu va'ajime ea najahe pu sisea are'avarono najaho'i va'ara. 13 Pu 'u'o 'avena sisea ajivi'inijaho 'avena siomahe 'ee ea atama navi'inijaho 'werui 'onahuma sonahiara.

Joni Papitisitara Kwamajina

(Matiu 14:1-12; Ruku 9:7-9)

14 Kini Heroti Jesu oni pinana ni'ima'ura rena onajaho hinarena hu ijá 'iama Joni Papitisita kwamana'e hura 'urinana'omo ike harurakaho huni vaji renu 'iamana. 15 'Ejume ea 'aho'a Hu Iraijana 'wavura. 'Ee ea 'aho'a Hu poropeti pina 'wavura. 16 'Enakaivo Heroti hu henarena ijá 'iama Joni ka'ene nara uroa ahatumahujara vukú'o 'urinana 'iamana. 17 Herotiasi oni hahi Herotira huni iri 'waravume Joni kamome tipurai ranamana. Herotiasiho 'u'uaha Piripu oni napara'e 'wahana. 18 Ijihuni hahi Jonira Heroti ijá 'wama Ara oni 'u'uijihuni napara ka'ene Herotiasi 'wahajaho areri parenu. 19 'Enajihuna'e Herotiasi Joni'i sena venana. 'Ene hu 'anae kwahuna ura renana kaivo hu areri parenana. 20 Herotiho Joni juhamana. Ijihuni maijaho hu henajaho hu ea niho'o mamaa 'ee arira ijihuna'e hu Joni 'ajoahana. Heroti Jonira iraka ka'ene 'waramujaho hu ura he'i 'ahauna kaivo hu hene niho'o natohwa'e haha henuna. 21 'Ene Herotiasira vea ka'ene ura renaja'ini nitu'eme Heroti nahejari vea rejume hu 'iruma niho'o mapoka mapoka vene irecha'eme ea kwaa 'ajohi'inijijahija 'ee Heroti oni namikia 'ee Karari opuni ea mama'ina Heroti oni roara. 22 'Ejume Herotiasi oni 'apaja roe javavume Herotiho ea ka'ene Heroti oni roajijahija kame niho'o ura rena paranana. 'Ejume Heroti napara kajaho ijá 'wama A iraki ura rena'amajaho na ijí mahuna 'wamana. 23 Heroti nahama 'warama ijá 'wama Godira na kimuna'omo a iraka ura rena'amajaho na nuni ara kwaa pwinana'a maho'o a ma'eju 'wamana. 24 'Ejume napara kajara oahoni va'e ijá 'wama Na iraka hu 'warahune? 'wamana. 'Ejume hu ijá 'wama A Joni Papitisita oni húmata 'uhua miha 'wa'amana 'wamana. 25 Napara kajara vea panisa'ika'i ninuma va'e Heroti ijá 'wama Joni Papitisita oni húmata tevua 'ahi ranamareje apena ro mi'amana 'wamana. 26 'Ejume Heroti niho'o natohwa temumana. 'Enakaivo hu ea mapoka puni una'i nahama 'warama jihuna'e hu napara kajaho papataarohana vo venana. 27 'Ene ni'aha kwinu Hu huni pwea ranama ijá 'wama Va'e Joni oni húmata 'uhue apena roa 'wamana. 'Ejume pwea kajara va'e tipura ara vaji Joni oni húmata 'uhuana. 28 Hu tevua 'ahi apena roe napara kaji mahume napara kajara apena va'e oaha mahana. 29 Joni oni tisaiporu epo henareja roe huni haha apena va'e kwananavara.

Jesura Ea Mapoka (5,000) Túasamahajina

(Matiu 14:13-21; Ruku 9:10-17; Joni 6:1-14)

30 Apasorua kú'o nianae roajime pura raka ka'ene vene 'ee najahajaho Jesu 'waravara. 31 Hu pu ijá 'iama Ja roajive nú kwaa pina ea pahijujino ma'uako siheria veja. Ijihuni maijaho ea mapoka roi va'uma kimareja pu 'iruma ihuni vea parenana. 32 Pu sisima 'ahi ajime kwaa ka'ene ea pahiji'inijino va'ara. 33 Pu va'aji'eme ea niho'o mapoka kimareja Jesu sisima 'ahi va'ume pu mumori ninukujaha arara kaji roe useme hi'eme Jesu roume piunavara. 34 Jesu roe 'e'uji'i kimajaho niho'o temume oja tura'i 'ahaana. Ijihuni maijaho pu sipi 'ajohi'ina pa'anepo hina ojuja'ina'e vejara. 'Ejumakame Hu iji'a uneunecha mapoka najahana. 35 Vea 'o'iro va'eme Huni tisaiporuepo Jesuni rori va'areja ijá 'wava Kwaa ikaho ea pa'ana kaivo vea iviamaa nipa'are'i venukúna 36 Ea mapoka irechamie ara arakino va'ajime uneunecha 'imena ija 'wavara. 37 Jesu eha vene ijá 'iama Jara pu uneunecha vaji'avara 'iamana. Pu ijá 'wava 'Ú nú va'e monia mapoka mapoka (200 kina) puretia 'imenareje pu vajihe i'eje 'wavara. 38 Jesu aporama ijá 'iama Joni puretia icharo navo? Va'a kiha 'iamana. Pu saramapene onu va'ume iji'a ijá 'wava Iropune 'ee kija no'ona 'wavara. 39 Jesu 'waravume ea mapoka va'e karasi 'ahi niku niku hijasavara. 40 Nia 'aho'a ea mapoka'e (100) hijume nia 'aho'a ea mapoka (50) hinape ojara. 41 Jesu puretia iropune 'ee kija no'o 'eke akúpi 'ahi nia nirii Godoni siporua 'oji'i merajahana. 'Ejume puretia tuachame Huni tisaiporu vajihume pu 'eke ea kajaho vajihapene ojara. 'Ene kija kaji 'u'o ija'ina venana. 42 'Ejume pu ijume tea hianavara. 43 'Ejume puretia 'ee kija pwina ka'ene navajaho nianae katija iropu ropu no'o vejume itusahara. 44 Parua ka'ene puretia kaji ijajijahija ea mapoka (5,000).

Jesura Toa 'Ahi Namina Va'ajina

(Matiu 14:22-33; Joni 6:15-21)

45 Hu Huni tisaiporu ijá 'iama Ja marako sisima va'ajimareje kami toi ropuna'i ara iha Petasaita va'eje Na ea irechami'i kaivo vu'ejukúna 'iamana. 46 Hu ea 'ajorame irechamiuma va'umakivi'i va kahi huri'i hine siporua 'onana. 47 Vea nusire'eju'e sisima soha riri na'eju'e Jesu Huhusu kari amari hinana. 48 Hu kimajaho sisima veje vahuni 'unamijaho pu puruva renana. 'Ejume asiasia ijiki nina'eje ijikari vahunijaho areri parenana. Nitunituhi puni ro'i 'ahaume Hu toi 'ahi roana. 'Enarena Hu pakivi'i asitahu ja'ina venana. 49 Vea ka'ene pu kavume Hu soha 'ahi namina roajaho pu vwihajajaho 'avena sisea raka 'wa'ika'i emaavajara. 50 Pu ea mapoka Hu kame niho'o tea junava jihuna'e Hu marako ijá 'iama Naranakúne masuani hi'i kaivo juvujaho areha 'iamana. 51 'Ejume Hu roe ijí sisima vaji aji'eme asiasia ka'ene hwasihajaho pa'arejume pu oja niho'o hwa'usaha'eme hina vwihajara. 52 Puni oja kaisini jihuna'e Hura puretia ka'ene tuachama vajiha jihuni maijaho pu niho'o pahena pakavara.

Jesura Kenesareti Atama Rukina Vejume Maranajina

(Matiu 14:34-36)

53 Pu toa ropuna'i va'e Kenesareti useme sisima puna anika vena hijara. 54 Pu sisima vaji rena rarihumakivi'i ea mapoka kajija marako Hu samai kavara. 55 'Ejume ni'aha kwino arara kajino ninukujaha va'ajime atakina kichame Jesura hinujihija kichiji'i irechavara. Kwaaka mapoka kajino Hu va'ujaho pu nijaimaru vejura. 56 'Ejume Hura ara mama'ina ma'u'umai ara rora kajino ea atakina 'eka roe maketi tinia irechavi'i Huni ateha uri 'unahuniji jarima 'waravara. 'Ejume ea mapoka Hu ateha uriji 'unavajaho sonahiara.